في تدوينة على حسابه الخاص على فايسبوك رد الدكتور خالد معرف على الهجمة الموجهة للإطار الطبي لفريق النجم الرياضي الساحلي فيما يلي نصها :
“اني مانيش متعود نكتب برشا عل الفايسبوك و لكن نظرا للهجمة الشرسة الي قاعد نتعرضلها اني و بقية الإطار الطبي لفريقي النجم الرياضي الساحلي نلقى روحي مجبر على الرد و التوضيح.
اولا، فريق في حجم النجم الرياضي الساحلي بخلاف الإطار الطبي راهو عندو لجنة طبية كاملة تضم أطباء من أعلى مستوى من مختلف الاختصاصات و معظم الاصابات يتم التشاور حولها.
ثانيا،
الموسم هذا كان استثنائي على جميع المستويات، تحضيرات بدنية متقطعة، نسق كبير متع المباريات زيد عليهم وباء الكورونا و إلي نعتبر انو نجحنا في التعامل معاه مع العلم انا كنا تقريبا الفريق الوحيد الي عمل اختبارات PCR دورية للاعبيه و نشرنا النتائج بكل صراحة و ما خبينا شي و هذا كلفنا برشا غيابات و لكن هاكا هو النجم الرياضي الساحلي مدرسة في كل شي.
ثالثا،
بالنسبة للاعبين: رضوان زردوم، الحاج محمود، غفران نوالي و محمد أمين بن عمر: تعرضو لاصابات متع احتكاك (Blessures de contact) الي هوما مع الأسف حد ما ينجم يتوقعهم.
بالنسبة لمالك بعيو تعرض لاصابة عضلية مع العلم انو مالك عمرو ما تعرض لاصابة عضلية قبل و إصابتو السابقة كانت على مستوى الرباط الجانبي الركبة و تعافى منها تماما.
بالنسبة لعلي سوما، إصابتو كانت في العضلة الامامية متع الفخذ و كانت خطيرة و خذا الوقت الكافي للعلاج و ما رجعناه يلعب كان ما قمنا بالفحوصات الي ورات انو شفي تماما. في المقابلة متع الفريق الاسواتيني عاود حس بأوجاع و هذي حاجة تنجم تصير و كي عاودنا الفحوصات لقينا التهاب في cicatrice و خيرنا انّا نتريثوا باش ما تصيرش مضاعفات للاصابة الأولى، و قلنا انو علي أن شاء الله يرجع في أفريل في كأس الكاف(و هذا الي قلتو في الفيديو) و هو حاليا قاعد يتدرب و على ذمة الإطار الفني.
صحيح الاصابات كثيرة و خاصة مع النسق الجنوني للمباريات الي قاعدين نخوضو فيها، لكن الاصابات راهي موجودة في الفرق الكل و تنجمو تشوفو الي حتى على المستوى العالمي، الفرق الكل تعاني مالاصابات و خاصة مع وباء كورونا. بالنسبة لفريقنا، حاليا الاصابات الي عنا معظمها اصابات متع احتكاك (Blessures de contact).
كلمة أخيرة لمدويني الصفحات الي تهجموا على الإطار الطبي، بقدر ما نفهم حبكم الجنوني للفريق و خوفكم على اللاعبين بقدر ما ندعوكم للتثبت قبل ما تنشرو معلومات مغلوطة تنجم تعمل بلبلة للفريق”.
KnOOzFM
